Die naweek van 22 Februarie 2019 was dit weer tyd vir Tafel Rondte Noord-Kaap se algemene jaarvergadering wat hierdie keer gehou is in Prieska. Tafelaars van reg oor die Noord-Kaap en ook ‘n paar gaste van Noord Natal sowel as ‘n gas van Pretoria, het die naweek bygewoon en altesaam 58 gaste was teenwoordig. Die naweek se verrigtinge het afgeskop, Vrydagaand by Prieska 161 se klubhuis met ‘n heerlike steak-ete en sommer net ‘n lekker geselligheid waar ou vriende weer kon opvang. Paar van die manne het sommer gekuier en gewag vir die son om op te kom, hulle moes darem vir die manne van Natal wys hoe lyk ‘n sonsopkoms in die Noord-Kaap.
Saterdag se verrigtinge het ook weer vroeg begin met ‘n Voorsitters Vergadering om 08:00. Daarna het almal aangesit vir ‘n heerlike ontbyt en om 09:15 kon die Algemene Jaarvergadering begin. Die dames was op ‘n “Ladies tour” na John van der Westhuizen se Coke museum en daarna na sy rivierhuis waar hulle verder die dag kon geniet. Die manne het ook hierdie jaar ‘n toer gehad en was dit nou nie lekker nie. Hulle is na Egbert se kampplek teen die Oranjerivier waar hul kleiduiwe geskiet en die meeste van die dag in die Jacuzzi deurgebring het. Attie het soos altyd weer gesorg dat daar lekker vleis vir die manne is. Die 4F’s manne van Noord Natal het gesê dit was by verre die beste 4F’s toer nog, oor 3 weke gaan 12 manne van Tafel Rondte Noord-Kaap op die 4F’s toer na Richardsbaai via Durban waar die Noord Kapenaars weer bederf sal word deur hul Natalse vriende. Daar word baie uitgesien na hierdie trippie.
Saterdagaand was dit die inhuldigings dinee van die nuwe voorsitter vir die Noord-Kaap Area sowel as die nuwe voorsitter van Prieska 161. Die dinee is altyd die hoogtepunt van die naweek en dit is omtrent iets om te aanskou, dit is ‘n “black tie event” en gaste doen baie moeite. Die mans en dames het baie mooi gelyk, veral die dames. Tjop de Vries was seremoniemeester en hy het gesorg dat die verrigtinge glad verloop. Na die prysuitdeling was dit tyd om die nuwe voorsitters in te huldig. Attie Naude van Prieska is as die nuwe voorsitter vir Tafel Rondte Noord-Kaap vir 2019/20 ingehuldig. Almal in Tafel ken vir Attie Naude en weet hy sal hom baie goed van sy taak kwyt. Attie, baie sterkte vir jou en jou gesin vir die komende jaar, almal van Tafel Rondte Noord-Kaap staan bankvas agter jou. Jaco van Zyl is ingehuldig as die nuwe voorsitter van Prieska 161. Baie geluk Jaco, alle voorspoed vir jou en jou gesin. Prieska 161 sien uit na ‘n goeie jaar saam met jou. Na almal die driegang maaltyd geniet het, was daar nog een tradisie wat moes plaasvind, ons eregaste, die manne van Natal is na vore geroep en bedank vir hulle bydrae tot die naweek. Daarna het Attie ‘n pakkie oorhandig en die kring is gevorm. Verder kan nie eintlik uitgebrei word oor die tradisie nie.
Sondagoggend is daar weer vir oulaas bymekaar gekom vir ‘n lekker ontbyt. Daarna is van die bestuurslede vir nog ‘n CVC vergadering na die klubhuis waarna almal vertrek het na hulle bestemmings. Die manne van Natal was heeldag op die pad en die laaste persoon was net so na 22:00 by die huis. Prieska 161 wil elke persoon bedank wat deel was van die naweek. Sonder julle sou die naweek nie so ‘n reuse sukses kon wees nie.